markuspolus.com

Það var heljarmikil snjókoma í Peabody í morgun þegar ég lagði af stað í áttina að miðborg Boston. Leigubíllinn skautaði um götur, en bílstjórinn var greinilega öllu vanur.

Rútuferðin til Nýju Jórvíkur var þægileg og tíðindalítil, nema hvað ég vaknaði af værum blundi við það að rútan var stopp og lögreglubíll á fullum blikkandi ljósum fyrir framan. Vegalögregluþjóninn stóð í gættinni á rútunni og spurði rútubílstjórann hvað væri eiginlega að, hafði líklega tekið eftir undarlegu háttalagi rútunnar. Bílstjórinn svaraði: "It has something to do with the suspension. But it seems to drive fine! I am sure we can make it all the way!". Lögregluþjónninn sér að greinilega ekki er mikið vandamál á ferðinni og svarar því "Sorry about the disruptance" og kveður. Þetta getur varla hafa verið mikið mál. Einhvern veginn fannst mér þó rútan alltaf taka einhver köst við að keyra yfir ójöfnur á hraðbrautinni og fór það í aukana eftir því sem leið á ferðina. Ábyggilega tóm ímyndun í mér.

Hér í Stóra eplinu verð ég út vikuna og ætla að reyna að skoða meira heldur en í tveimur síðustu heimsóknum (sem voru reyndar styttri). En ef ég þekki mig rétt þá verð ég bara að dúlla mér í Miðgarði. Annars byrjar þetta ágætlega, alla vega komst ég í voðalega furðulegt skap og er búin að gera at í búðarfólki og er búinn að taka ljósmyndaæði í ljósadýrðinni í kringum Tímatorg og í búðinni Leikföng'rum við sem er alveg geggjuð búð. Ég fór ekki inn til að kaupa neitt, bara til að dást að dýrðinni. Ég er um það bil að verða búinn að skella einhverjum myndum inn á Flickr. Njótið!